Romans 3

Kobol me qee eu kobol me wooldoc ihoc qee

1Juda dana age cel jicna Juda dana qee eundec wooladegina? Cel ceteh me eu dewenega cagu qoc kobolna calena? 2Ese, ceteteh me bahic mati calen. Casac ceteh me bahic oso eu odi, Anut uqana je Juda cofdoqagannu aden. 3Mele, leih age je eu qee toodoloin. Euqa eu adi? Age Anutna je qee toodoloinfi Anut uqaha uqana je qee toodoiaunfo? 4Qee bahic! Anutna jaqec je odi madena:

“O Anut, hinana je cunug eu mele bahic
dana cunug eu fegina.
Odocob hinana je eu gesilifeig
hinana je eu tutuc himec foqagan,” ena.
(Buk Song 51.4)

Eunu dana cunug age uhulegina qa Anut uqa himec saen gaid je mele madena.

5Odocob eu adi? Egena kobol tutuc qee eu Anutna kobol tutuc bahic eu camasac mudecebfi ege adi madeqan? Ege madi, Anut ameg me qee wadacgena eunu uqana kobol eu tutuc qee, eqanfo? (Ija danana cisdoc himec toodudu madiga.) 6Qee bahic! Anut uqa ititom qeefi dana cajaca agena kobol adi gesiligian? 7Dana leih age madegina, “Ijana uhulec je Anutna je mele camasac mudecebfi odocob eu uqa binan sulec mahamaha ihoc lifei uqa cain gesiltimei ija silail dana imei ameg me qeena wadacteiaun,” egina. 8Odocob dana oso madigian, “Ege kobol me qee odoqa qa odocob kobol me euna caligian,” igian. Eu dana leih age ijanu um qu mamadi ijana me je madec eunu je me qee i ec madegina. Dana eu age wadacadec ameg me qee oqagan eu mele bahic.

Dana ititom oso qee bilel

9Odocob eu adi? Ege Juda dana Juda dana qee eundec wooladecfo? Qee bahic! Ija wele maadiga, silail ege dana cunug cilehgen, Juda danaca Juda dana qee eundecca cunug. 10Anutna jaqec je odi madena:

“Ititom coboc dana oso maha ina qee bilel.
11Dana oso uqa fogo docca qee.
Oso uqa Anut megec cabi qee ona.
12Cunug age jic me eu culein.
Cunugca odi age dana me qee bahic calein.
Osol oso ha kobol me qee odona.
(Buk Song 14.1-3; 53.1-3; Saveman 7.20)

13Age conoga eu qalqal heel cebec cinigwe.
Age beilamagana age uhulec je madegina.
(Buk Song 5.9)

Age biamaga dunuh eu man sononec agena ceeh sahalic me qeeca.
(Buk Song 140.3)

14Age je me qee gulihinca conogana gaid madegina.
(Buk Song 10.7)

15Age dana qagadocnu mahuc bahic gugulegina.
16Saen cunug age ceteteh me qee mumudi culumen geh dana adegina.
17Age dana malol bilec kobol qee toodogina.
(Aisaia 59.7-8)

18Age Anutnu cumunec nag odi qee dogina,” ena.
(Buk Song 36.1)

19Odocob ege doqona, Mosesna loo je eu uqa egena silail eu himec ihacgena, eunu dana oso uqa ija dana ititom ec madecwe qee. Eunu cel je loo je madena eu dana cunug age je madecwe qee bilimeig dana maha cunugnadec ege Anut amegna cahuldocca biluquna ec madoqagannu eu dana loo je bisalu bilegina eu age maadena.

Dana oso uqa Kraisnu waug meleen uqa dana ititom

21Qilaqa Anutna kobol uqa ege dana cajaca ititom ec madena eu camasac men. Eu loo je toodoc jicna qee calel. Eu jic filna calen. Odon qa je eu je hahun madec danana jaqec jenaca Mosesna jaqec jenaca nijia eu Anutna kobol ititom inu je camasac madena. 22Anutna kobol ititom eu odi. Dana Jisasnu waug meleena eu uqa Anut dana ititom ec madena. Odocob dana cunug Jisasnu wawaga meleena age ijanaga dana ititom adegina. Anut uqa dana am cunug odi odona eu odoc filna qee odona. 23Ge, ege dana cunug ege silail mom eunu ege Anutna fulacdoc ben eu ocwe qee. 24Anut uqa eelgec uum igina. Uqa Jisas Krais golacna ege fajigen euna himec uqa ege dana ititom gena. 25Anut uqa gemag bec gondocnu Jisas Krais ihandon. Eunu uqa cal meceb uqa golacna dana uqanu wawaga meleena eundec agena silail cagasiadigiannu nesili ehuden. Anut uqa dana weledec camuhulaadei agena silailnu mahuc ameg wadacadecnu qee cisdoloi. Eunu Anut uqa odonna uqana kobol ititom eu camasac ihacgen. 26Qilaqa uqa dana agena silailnu cisdona. Eunu uqa uqana kobol ititom eu qila camasac mudigia odona. Eu odina Anut uqa uqadodoc eu ititom bahic ihacgena, odocob dana Jisasnu waug meleena uqaha Anut dana ititom dona.

27Eunu egedodoc binanige sulecnu ihocfo? Qee bahic! Jic eu wele menen. Eetana jic eu menen? Acahna loo je toodu odoc kobol euna jic eu menenfo? Qee bahic! Wawige meleec euna jic eu menen. 28Ge, ege odi cisdoqona, wawige meleecna himec dana uqa ijan ititom eu ona. Uqa loo je toodu odocna ijan ititom qee ona.

29Eu adi? Anut uqa Juda dana agena himecfo? Uqaha Juda dana qee agena Anut qeefo? Ese, uqaha Juda dana qee eundec agena Anut. 30Anut uqa osol himec. Odocob Anut uqa dana age deweg cagu qoc agena wawaga meleecna age dana ititom ec adigian. Odocob uqa dana age deweg cagu qee qoc agena wawaga meleecna ageha dana ititom ec adigian. 31Eunu ege wawige meleenafi ege loo je hibemdoqonafo? Qee bahic! Ege wawige meleenafi ege loo je eu hehdocomun gagadic tawena!

Copyright information for AEY